檸檬茶!

我好少飲檸檬茶,
因為在茶餐飲到的不是太甜就是有苦澀味,
好少食到既有茶味又有檸檬味但又不太甜的檸檬茶.

近日一杯檸檬茶就搞到滿城風雨,
只為有位補習天王TIP中了今年中文科的作文題目,
有考生認為對自己極為不公平,
而且懷疑有人洩露試題,
所以去信考試局,廉署要求徹查此事，
一定要抽出幕後黑手云云，
誓要替自己取回一個公道！

個人認為『檸檬茶』是一個極為普遍的題目，
你入到茶餐廳不是要奶茶，咖啡就是檸檬茶了，
既然考試局曾以『手提電話』為模擬試題，
人家胡亂估中檸檬茶亦不出奇，
正所謂『如有類同，實屬巧合』，
而且現在估中的是作文題目，
就是真的估中又何妨？
難道那些考生可以把補習社的範文照字搬紙咩？

其實只是一件雞毛蒜皮小事，
那些慌死蝕底的考生就大鑼大鼓係咁嘈，
我看愈嘈得厲害那些愈是考得不好那班學生，
佢哋可能希望嘈幾嘈就可以重考或者取消那部份的分數，
這些抱有僥倖心理的學生如其花時間在這方面，
倒不如專心努力把剩下的科目考好一點吧，
難道把人家拖下水自己就會有好結果咩？
簡直是浪費寶貴的時間！

為何『對不起』!

歌手陳奕迅因早前曾批評日本天后濱崎步係香港演唱會"咪嘴",
連日來受到不少步姐的粉絲評擊,
而且還要向台灣avex董事長講『唔好意思』,
我覺得真是一件匪而所思的事情!

如果陳奕信所言非真,
那就不是說『唔好意思』而是『對不起』了,
但如果他所說是真的,
那他何錯之有,
有什麼『唔好意思』喎?
要講『唔好意思』的應該是濱崎步自己才是,
演唱會是人家來看你的現場表演,
除了舞蹈,服裝外,唱歌是最重要的一環吧,
如果演唱會都可以"咪嘴"的,
那麼人家為什麼要購票入現場看,
坐在家裏聽CD,看MTV不是一樣嗎?

現在,
要麼步姐出來澄清自己無"咪嘴",
然後要陳奕迅正式道歉說『對不起』,
如果真的是"咪嘴"的,
就要自己行出來說聲『唔好意思』,
哩個係什麼世界?
是非顛倒,對錯不分,
陳奕迅請不要對人家說『唔好意思』,
對自己說吧,
我對你有點失望!

動物篇:與貓摔跤的小孩

圖片：蘋果日報

技能是由小培養出來，
這個摔跤手的兒子正自發自的練習着．
求生的本能是要經過鍛鍊的，
如果自小受盡呵護，
孩子就不能夠獨立．

每個父母都會溺愛自己的子女，
但每事每物都幫他安排得妥妥貼貼，
那樣不知是愛護還是傷害了！
每個人都要從摔倒中學習成長，
從少都没面對過失敗的人，
當有一天真正要自己面對挫敗時，
他只會對那種挫拆感到手忙腳亂！

或許有人會說這是過時的想法，
所謂此一時，彼一時，
難道要大家回到打仗的年代一樣受苦嗎？
但適者生存是萬世不變的道理，
其實我們都只是生長在温室的植物，
今天就讓我們多點跌跌撞撞，
它日大家可能變得更堅強了！

ps:小孩切勿模仿以上動作,因為是犯了虐畜的！

臭男人與女人

臭男人...
這是女人時常掛在口邊用來鬧男人的,
當女人被心愛的男人拋棄時她們會駡:
『臭男人,我恨你!』

但為什麼是『臭』而不是『香』,『羶』...
是不是男人不愛洗澡成身臭汗味呢?
我們成日說嘅男人味又包不包括這種臭汗味呢?
自古男人就同粗獷,奔放,不修篇幅扯上不解之緣,
好像武松打虎豪飲十五碗"三碗不過崗"烈酒,
關雲祥赤着上身忍痛刮骨療毒等等都是代表男人那種粗獷的形象,
相反女人就比較整潔,優美,通體芳香,
例如有楊玉環『春寒賜浴華清池，溫泉水滑洗凝脂』,
所以有『女人香』,『臭男人』的分別!

有時女人就是喜歡男人那種帶點粗獷的『臭』,
當男人赤着上身渾全流着汗在搬動時,
渾身上下肌肉充滿爆發力,
不少女人會為那種男人味覺得全身酥軟,
無錯就是那種帶有臭汗味的男人味,
這可能是人類進化過程中遺留下來的原始本性,
那陣又酸又臭的汗味往往就能夠引發女性原始的慾望,
試想想如果一個男人極度整齊,冰肌雪膚,渾身散發芬香,
這不是會給人一種很不自然的感覺嗎?
而且亦不能夠給予女人一種安全感!

女人一句『臭男人』其實包含了愛和恨,
愛是因為臭男人會說甜言蜜言,
使女人時常感到十分窩心;
恨是臭男人多會見異思遷,
對女人不會從一而終,
使到她們傷心欲絶,
所謂恨之愈深,愛之愈切,
臭男人愈傷得女人深,
留在她心裏的烙印又愈深!

臭男人從來不會承認身邊女人的身份,
但女人總是認為他默認了;
臭男人從來都没有在『我愛你』後面加上『一世』兩個字,
但女人心裏會自動幫他加上去;
臭男人從來都只在乎曾經擁有而已,
但女人卻偏偏醉心於天長地久;
女人心裏明白臭男人不曾她保証過什麼,
臭男人徹頭徹尾是一個玩世不恭的傢伙,
這點女人是清楚明白的，
但女人還是永遠無法把他放下,
夜深人靜時女人會情不自禁的嗅着他的汗衣哭得死去活來，
就是那個臭男人己經離她遠去,
女人還是不願相信那只是個夢幻式的愛情,
她只希望總有一天那個臭男人會再回到自己的身邊,
讓她再次嗅嗅他的體味!

ps:就當小說般看吧!

動物篇:貴婦（假）狗

圖片:蘋果日報

今日本店要隆重介紹一隻罕有的寵物 ~ 新潮貴婦狗
它不單高貴大方而且外型特別，
而且為數極少，全球只得數千隻，
不少日本明星都已購入做寵物，
現在日本己經有二千多人買了！

但希望大家不要學日本女星川上麻衣子那樣投訢我們，
買了回家多時，直至有天帶它去寵物店修甲才發現它無指甲，
因而指責我們『貨不對版』，
『實情』係由於它是特別的品種，
所以不會叫，不吃狗糧，
更加不可以帶它去寵物店修甲，
因為它是有蹄無甲的！

飼養它只要每天餵飼新鮮清草數斤，
或加上一些如蘿蔔，栗米等雜糧即可，
是一種十分容易飼養的貴婦狗！
這種貴婦狗原價港幣三萬大元，
推介期間只售優惠價港幣一萬大元，
有意者請盡速與本店聯絡，
供應期有限！

結論:
假鑽石手錶好難分出真假,
假狗就會更加難了??

新與舊

聽聞觀塘市中心重建計劃己有初步定案，
可能會興建一系列的商住大廈和步行街，
其中數座會是樓高四五十層的摩天大廈，
我不曉得什麼城市規劃，
現在的觀塘市中心實在是十分殘舊，
不單建築物老化，四週更污糟不堪，
實在有重建的必要，
但我不希望重建後的觀塘又變成一棟棟的石屎森林，
不單把四週的景物全部擋住，
而且空氣流通不足，
政府時常把什麼『藍天計劃』掛在口邊，
但每一處的重建都不見她有落實這個口號，
這是不是空口講白話嗎？
到底政府要到何時才會明白，
市民所要的不是那些參天高樓和千篇一律的商場，
我們要的是一個空氣清新和見到藍天的城市呀！

APITA,好失望!

太古城UNY改用同系較高檔的APITA代替,
今日參觀後使我大失所望,
不論在裝俢上,店舖上,貨品上等等,
都同原本的UNY差不多一樣,
如果不看新招牌根本不知道它改變了,
再仔細觀看四週貨品,
亦不發覺那裏比以往高檔,
好失望,好失望!

如果你抱着看新東西心態去看,
我會勸你還是省點時間和腳力!

買了!

實在太吸引了,
今天買了一盒朱古力橙餅和一包拖肥糖,
味道好香好濃好有味,
現在有一句話時常會掛在嘴邊:
『少吃多知味,多吃大肚皮』!

健康餅乾

早前聽大家講市面上的植物牛油不健康,
什麼反式脂肪,比一般純正牛油對身體更有害.
前幾日經過馬莎見到佢地有些非氫化植物牛油餅乾賣,
見到心郁郁真係想買返屋企食!

我不是時常會到馬莎買餅乾,
但她們的餅乾同典奇又幾好味的,
最好就是下午用來『高茶』,
而且部份餅乾還有light版,
食咗無咁肥嘛,
啱哂我哩啲為食貓啦,
佢地歀式又多,
包裝又鬼咁靚,
真係唔食睇吓都好,
下次再經過我實忍唔住買返幾包!

不可愛的女性

什麼女性最不受男性歡迎?
這個問題又是因人而異.
你喜歡的我可能不喜歡,
難以下一個確實的定論,
但同朋友談過,
有些女性真的好難頂!

多嘴的女性:
好怕那些由朝講到晚唔停的女生,
她們嘴巴好像裝上了機械一樣,
吱吱喳喳永遠都不會疲倦的，
而她們所講的都是別人的是非，
好像同事間的八卦傳聞，
又或者是朋友間的是非，
總之是没完没了加鹽加醋，
非要由朝講到晚不可的，
身邊的人最好帶上耳罩，
免得長期受噪音影響！

懶可愛的女性：
林志玲和楊承琳就是表表者，
說話總是扮得萬二分温柔,
時常嗲聲嗲氣扮可愛,
又或者喜歡行為造作,
例如用食指按着自己的臉蛋說話,
行路又入字腳扮小女孩,
作狀到爆,睇見都唔開胃!

重有一種就係太聰明的女性:
她們非常聰明但又處處表露無遺,
你每個動作每個想法佢都了如指掌,
而且愛用自己小聰明來控制男人,
這樣的女人好易會令到身邊的男人心寒,
所以有時扮蠢的人女性會十分可愛的,
因為愚蠢的男人都喜歡扮演保護者的角色嘛!

新鮮人

如果我死了,
我的名字只會留在這個blog裏!
人死留名,
但我不曾為歷史做過什麼豐功偉業,
亦無能力去做一些遺臭萬年的醜事,
所以我的名字不會出現在歷史上,
百年之後,或者只是十數年而己,
再没有人知道有我這個人出現過世上!

但無論我存在與否,
這個blog都會一直長留於這個虛浮世界,
時常來的不會知為何我不再寫新文章,
只會發覺我『停下來』，
久而久之,他們都不會再來了;
偶然路過的,
如果覺得文章有趣,
可能會略為流連數天,
但不久見無新文寫下,
亦會一去不返!

没有人會為一個平常人寫傳記,
傳記從來都是為偉人而產生的,
但我這個平常人以往的點點滴滴,
喜怒哀樂都會一一留在這個網上世界,
假如blogspot一路存在下去,
我的生活點滴亦會繼續在這裏延續下去,
希望來看過我的文章的人,
都記得世上曾經有個儍人叫 ~ 新鮮人!

韓國燒

昨晚和朋友出尖沙咀食韓國料理，
不是我平時食那種98元任食套餐,
而是那種逐種肉逐碟叫那一類,
店子是由韓國人開的,
論價錢當然没有任食套餐便宜,
亦不覺得那裏的肉超級好味,
但卻食到一點韓國傳統味道!

我們三個人叫了四種不同的肉類,
每人一碗白飯一碗蘿蔔牛腩湯,
另外有七八碟不斷添加的輔菜,
老實說味道是可以的但又不是超好,
但店主不時幫我們加輔菜調較火力...
見燒烤的鐵板黑了又主動換上新的,
就是這樣的服務使我留下良好的印象.
晚上八點,
環顧店內只得我們和兩三枱外國人,
生意可想不是十分好,
可能是現在滿街都是任食韓國燒烤的原固,
這些傳統韓國人開的店子己經買少見少了.

我知道在另一邊尖沙咀韓國街還是有數間傳統的韓國店子,
但由於不懂韓文所以從來都没有幫襯過,
不知是不是會比一般的好味呢?
有機會我都想去試試!

男人不壞，女人不愛?

昨天hanamaru談到男人不壞，女人不愛？,
今天看報紙又見到徐妻說對十三年愛情無怨無悔,
難道有些女人真的會對壞男人死心塌地？！

我諗首要條件係女人覺那個壞男人『好』，
當然『好』是因人而異，無一定的標準．
小學時都己經發現這個現象，
就是那些愈頑皮的男生就愈多女生留意，
愈唔交功課，愈給老師駡的男生就愈多『女』係身邊，
其實真係唔多知點解？

到左咗中學這個現象就更加明顯，
中三有個幾型嘅同學佢成日逃學考試又差，
但係身邊啲女生就『貨如輪轉』，
最難頂係當時連啲MISS都錫到佢濃,
諗起都火滾,
好彩佢後尾升唔到中四,
真係心都涼埋呀!

你問我點解我都唔識解!
這個問題可能女生才會答得到,
但歸根究係女生迷戀那種『壞』,
就算明知那個男人對自己唔上心,
又或者男人根本是一腳踏多船,
女人就愈會不停的想起他,
是不是愈得唔到的愈是想要的原固呢?
是不是享受那種挑戰無結果的刺激呢?
相反對於呵護備致的裙下之臣則不以為然,
女人那顆心總是喜歡向着得不的男人身上?!

陪我成長的美味回憶：雞蛋撈飯

這篇是由從一碗餐蛋麵說起所開始的，
我要回憶的是【蛋撈飯】，
一碗熱騰騰的白飯上加隻生雞蛋，
在一個寒風刺骨的冬天裏，
没有什麼比一碗生雞蛋撈飯更美味！

這碗飯的出現不是因為母親所煮，
亦不是看見什麼美食大全所學，
只是小時候有一天偶然覺得肚餓，
遍尋家中只有生雞蛋數隻和一些隔夜飯，
由於肚餓難捱，所以就自己嘗試下鑊煎蛋，
那時我還是得八九歲左右，
技術差劣的把雞蛋煮到半熟不生，
然後再把隔夜飯隔水返蒸，
待飯熱後就是這樣加上一隻半生熟蛋，
最後加上醬油調味，
可能是異常肚餓的原固，
所以覺得那碗熱騰騰的雞蛋撈飯真是人間極品．

所謂食髓食出味，
自此我和弟弟就時常乘母親出外買餸時煮『蛋撈飯』，
久而久之母親就開始懷疑，
有一次還問我為什麼家裏的雞蛋時常會少一兩隻，
於是我就話可能是老鼠偷吃了，
這樣此事就不了了之，
本來以為真的可以瞞天過海，
但過了兩天母親又再問我一樣的問題，
自以為聰明的我照樣對答啦，
結果是母親問：『那兩隻老鼠是不是你們兩兄弟？』
而我們就只好笑笑口認罪了！

執輸行頭慘過敗家!

【執輸行頭慘過敗家】
這是香港人的座右銘,
無論是什麼新東西,
不知適不適合自己,
不知價錢是如何,
甚至不知是什麼來的,
總之就是一湧而上,
爭先恐後誓要看過究竟!

以前的萄撻如是,
格仔餅,魚翅煲,冬甩,日本漢堡飽等等都是一樣,
軟硬T-SHIRT,觀音開庫,于蘭派米,學校派位....
甚至近期嘅H&M時裝店開幕也是人山人海,
投資方面香港人都唔會執輸的,
早前大陸紅籌電訊,地產開售又是排隊排天光,
總之唔理三七二十一有隊排咗先,
有嘢買咗先,有彩攞咗先,
咁樣就唔會執輸喇!
其實好多嘢賣咗都無用,
又或者唔啱自己用自己著,
又可能味道不外如是而已,
最大件事係股票都人買你買,
啲阿毛睇都未睇清又去買,
走唔切就一頸血囉!

你可以話係長處,又可以話係短處,
就是這樣的心態使到香港永遠走在別人前面,
但亦是這樣的心理使到香港人異常貪小便宜,
而且有時處於十分盲目的境地,
針無兩頭利,要什麼樣,
就看你自己了!

就讓一切劃上句號!

三個女人的命運就由一個男人的行為影響,
母親,妻子,女兒的悲痛是由徐步高死後開始.
今天偶然看到徐母的專訪,
覺得她是一個極之堅強的女性,
在千夫所指的情況下仍然能夠重新站起來,
勇敢門對拍過不停的鏡頭和無休止的傳媒追擊,
又得不到法援處的資助,險些要獨自面對審判,
還要一次又一次在法庭裏細聽兒子的罪行,
這不是一個平常人可以忍受和面對的.

今天全案審結,
雖然還没有結果,
但徐母只是希望一切都會劃上句號,
從新與媳婦,孫女重過新生活,
其餘的就由它隨風消逝遠去吧!

日本地鐵強姦

有時真係唔係好明啲日本人嘅思想,
噚日看報紙見到日本有一名少女係地鐵內被人非禮,
那個色魔話:『你唔準叫,否則無論去到邊,我都會跟足你一世!』,
就係咁樣,那個色魔就係車廂內非禮咗個女仔成個鐘,
而且事後還拖那名少女去月台廁所強姦,
當時車廂內有成四十多人,
他們竟然可以視而不見,
只是給那個暴徒恐嚇一吓就全不敢出聲了,
任由那個少女被人非禮強姦,
哩個係物嘢世界哩架?
點可以係一個發逹社會發生架??
如果有一天受害者係自己的女友或女兒佢地又會點諗呢?

最奇怪係那個少女又會被一句咁低能嘅說話嚇怕,
任由那個色魔非禮強姦成個鐘??!!
而車上那群人又係唔係人黎架?
點可以視若無睹無人出手阻止架?
成個車廂咁多人,
一人一拳都打死佢啦,
佢地不加援手簡直不可接受!

其實這類新聞以往都經常聽聞,
日本女性係火車上被人非禮都屢見不鮮,
驚訝嘅係他們就算是女性都好像習以為常,
而且並不覺得是什麼大不了的事情,
所以係社會上並没有引起太大的回響,
聽講有些日本少女還以給多少人非禮過為傲,
認為愈多人非禮自己就代表自己愈有魅力,
真係發神經呀,
咁樣諗嘢都有,
連女性都係咁諗時,
想話有人去糾正這種歪風都好難了,
真係唔知佢地個腦係點諗嘢!!??

如果哩啲嘢係香港發生,
你話結果會唔會有好大嘅分別呢?

你值多少？

『全世界啲人都係雞同鴨!』
這是出自朋友嘅朋友的一句話,
絶對真人真事!

哩句說話真係聽到我毛骨悚然,
佢認為任何人都有個價，
你唔願只不過是嗰價未逹到你心目中那個，
一百萬？二百萬？二千萬？一億？
定亦或是一些你好想得到但又無辨法做到的東西呢？
他的理論係只要嗰價錢合意就人人都會出賣自己，
出賣自己包括尊嚴，肉體．．．

聽說那個人不單是『口講無憑』，
由於家財億萬洗唔哂,
所以時常會『附諸行動』，
而且無往而不利，萬試萬靈，
佢以住嘅經驗係只要你一猶豫就化表你會考慮，
只要你一考慮就總會有個價可以動搖你．

初初聽到這番話我都覺得是語無倫次，
但靜靜細心一想，
如果真的有人問你這個問題時，
你心底裏會不會暗自問自己什麼價錢會動搖到你？
不要說自己品格高尚，知足常樂，
而且絶對不會考慮這種下流的交易，
因為就算只是暗自考慮就己經代表你有動過心了！

若問我自己，
我都唔敢百份百包保自己會絶不動搖，
但我總不希望自己會為利益而附上尊嚴！

ps:不過我都唔信真的會有人問我這個問題! =p

九流詩詞～《不明》

清明時節雨紛紛，
無遮路人好失魂。
借問賣傘何處有？
頑童中指向雲端。

註：純屬老作！

【滑浪板】?

繼『騎馬仔』同『減肥腰帶』被消委會踢爆無效後,
而家又黎招『滑浪板』,
好彩啲人都醒返少少,
再唔會以為企係上面搖吓搖吓就會減到肥,
所以今日所見都係得小貓三兩隻係度玩吓,
好多人都係行過八兩嘢就算數,
而最後嗰場就變咗兒童遊樂場,
得返班細路係度玩同嬉戲,
真係大快人心,
唔洗咁多人再中招囉,
想健康有效梗係要做啲自發性運動至有效嘛,
哩個世界邊度有免午餐架!

再次青蔥歲月

我叫他做【怪醫秦博士】不是什麼black jack!
不知為什麼到了這個世紀從前的卡通人物都改了名,
由細到大睇漫畫都是叫佢做秦博士,
現在叫Black Jack好唔慣;

仲有"阿瞳木"這個名,
我都知是日本譯音,
但是看到個名真是會不明所議,
還是叫做【小飛俠】有親切感!

當然又唔少得要講吓"多啦A夢"啦,
其實嗰名又中又英,發物嘢A夢呢???
我都唔知點解好好哋又話要統一改名?
叫叮噹咪好囉,簡單清楚易記!

其實我想講嘅係我老家還有四大箱漫畫啊,
其中最多嘅係日本漫畫之神手塚治虫的作品,
當然也有我當年至愛【臘筆小新】啦,
我好想攞返出來睇吓呀!

青蔥歲月

這張【日本紅白紀念盤】打破了我多年没有買碟的紀錄,
內裏全是八十年代紅極一時的日本金曲,
雖然我對日文一曉不通,
但這些日本金曲確實陪伴着我成長,
聽着一首又一首的日本歌曲,
好似小林明子的【Fall in love】,
鄉裕美的【哀愁的casablance】等等,
一片又一片的青蔥歲月又再活現眼前!

在那個年代,
日本文化差不多完全充塞着我們的生活,
日本電視刻集有三浦友和,山口百惠...
日本動,漫畫有高逹,叮噹,小甜甜,慒面超人...
日本歌有西城秀樹,近藤真彥，松田聖子，五輪真弓...
日本造型時裝有蘿白褲,Matchy Cut,Checkers...
日本化妝品有資生堂，Kanebo...
香港不少歌星在改編日本歌曲,
好似林憶蓮的【搖擺口紅】是改自松田聖子,
梅艷芳的【夕陽之歌】是改自近藤真彥,
除了唱改編歌曲,看日本電視劇集外,
當然還有每年年尾都一定"僕"係電視看的全日本紅白大賽啦,
可以講那時整個香港年青人文化都極之受着日本潮流影響!

那時不講慰安婦,
不講參拜靖國神社,
人人只會響往追逐最新最潮的風氣,
而當時香港人眼中日本就是潮流的指標,
但隨着日本經濟走下坡,左翼份子冒起,
日本己經不再是潮流的唯一指標了,
日本劇集的影響力也再没有八十年代時那麼巨大,
我們今日迷的是韓星,韓劇,韓文歌,
一切一切都隨着時光流逝慢慢變得了無痕跡!

PS:日本紅白紀念盤資料
同期發行的還有城秀樹專輯,
去年11月就有近藤真彥和五輪真弓的精選,
全部都是當年一時無量的精彩作品!

帶埋阿媽去見工?!

你唔好話我偏見,
真係一代不如一代,
噚日朋友先講過請人請到嘔血,
有啲見工遲到sorry都無聲,
有啲唔黎電話都無個,
有啲面試又答非所問,
成日見足八個無個掂!

今日睇報紙見到啲重誇張,
見工要帶埋阿媽或男朋友一齊喎,
唔係淨係陪佢去等咁簡單,
而係要陪埋佢入會客室一同面試喎,
真係千奇百怪物人都有,
有個重離舖呀,
第一日返工連阿媽都帶埋去,
你估幼稚園返學咩,
十幾廿歲人仲要阿媽帶,
真係請黎都哂氣啦,
叫佢返屋企飲奶啦!

而家啲後生仔咁鬼廢,
佢地啲父母都要負上好大責任,
由細到大呵護備致,
搞到佢地飯來張口,
衣來伸手咁樣,
小學升中學父母揀嘅,
初中升高中父母揀嘅,
上大學找資料又係父母代勞,
有物大鑊嘢又係老豆老母頂住,
樣樣幫啲仔女做哂,
搞到佢地無哂獨立能力,
物都要靠人,自己好似廢物一樣,
而家連見工返工都要阿媽陪,
唔通第時洞房都叫埋老豆老母指導咩,
真係一蟹不如一蟹!

與牛油磚角力

小時候早餐多數係牛油搽麵包,
有時再加杯由奶粉冲出來的牛奶就是一餐.
那時用的牛油就是這種硬到死嘅牛油磚了,
不過嗰牌子就係Anchor唔係什麼大公司牌!

記得哩啲牛油磚真係硬到不得了,
係電櫃攞咗出黎有排都唔會軟,
加上又趕住返學,
所以唯有用暴力對付,
出盡飲奶力用把細生果刀先至切到少少,
搽落塊麵包時又唔多黐喎，
搽來搽去搞到塊麵包好似"舊"咸菜咁,
溶溶爛爛真係睇見都唔開胃呀!

後來出咗什麼植物牛油,
一打開就可以搽,
又軟又方便正到爆呀,
從此就唔洗朝朝同"舊"牛油磚鬥力囉,
可惜植物油就是植物油,
點都無真正牛油咁香口,
但係無計啦,方便好多嘛,
而且又健康啲囉!

火都黎埋,要爆粗！

我都好耐無試過大聲用粗口鬧人,
但噚日係旺角我就爆粗了!

同朋友係旺角步街行着,
正當我們談論着某間店舖的擺設時,
忽然間我下體遭人用手抽袋打了一下,
猛然回頭看過究竟時,
一個七十歲的阿婆就指着我鬧:
『你做物跟住我呀?XYZ星星月亮太陽．．．．』
無端端俾人打一嘢，重要俾人問候，
我都唔知發生什麼事,
之前明明身邊一米以內都無人，
而且亦未曾見過這個阿婆係我們身邊出現過，
嗰時真係把幾火，見佢還不停口，
於是回佢一嘴：『黐線，邊個跟你呀，你有無搞Ｘ錯呀？』
我朋友把我拉開後，
本來都唔想同佢斤斤計較了，
但她還就是跟住我們當街破口大駡，
我無名火起三千丈，
於是就停下來向着她大駡：
『黐Ｘ線呀，搞物Ｘ嘢呀你，有病就睇醫生啦！』
但她還是死心不息係度”吖芝吖咗”，
本來我火滾到想丙多佢兩鑊,
但心諗佢都係有病居多了，
實係唔知黐咗邊條根，
所以都費事理她，
回頭走了算數！

我本來是一個十分尊重老人家的人，
但當街當行無原無故給人破口大駡，
還要被她打了一嘢下體真係好火爆，
就算她真是有病都不可以亂來的嘛，
所以就忍無可忍爆咗佢一鑊金了！

不文遊戲Happy Corner

有小學生學人玩"Happy Corner",
好玩唔玩，攞哩啲嘢黎玩，
我諗佢哋真係唔識死，
如果唔小心玩出個大頭佛就大劑囉！

以前就話大學生玩啫，
而家癲到連小學生都玩，
真係好學唔學，
邊度有人咁蠢架，
攞自己下身撞條柱，
你估你嗰度用鐵做咩？
如果整親唔痛到你入心入肺？
稍有不慎就會變『單春折郞』添！

讀中學時我哋啲男仔都成日玩啲不文嘢，
嗰時最流行玩『一陽指』，
物嘢係『一陽指』？
咪雙手合實，淨係"樹"起兩隻食指囉,
跟住等人哋唔察覺就一嘢插人C眼囉,
被插嗰個真係痛到眼淚水都標埋架,
你話係唔係無聊之極吖,
不過話時話,
哩啲『一陽指』就點都無"Happy Corner"咁危險了，
起碼好難會整親身體吖，
但係"Happy Corner"就唔同了，
如果成班人玩到癲哂用力過度，
隨時會整傷"兩粒波子"架,
到時你話點收科吖?
唔通揾PAAG整返粒咩??

後記:
"甘大滋"又係細個時啲咸濕嘢,
佢首廣告歌係"甘大滋,咁大枝~~~~",
嗰時個個男生一路唱一路雙手係下體位置做埋啲不文動作,
搞到啲女生黑口黑面，
係唔係好白痴呢?
我而家諗起都笑到肚痛呀!

特別新聞報告

今晨七時三十分左右，
觀塘月華街街頭發生一單兩車相撞意外，
据現場所見懷疑是一輛白色私家車撞向的士尾部，
而事後相方把車駛埋一便再相討處理事宜，
記者所見相信車上兩位司機並無大礙，
唯事後兩人各自打電話向保險公司滙報，
估計事件會好快平息！
報告完畢．

新鮮台記者新鮮仔現場報導．

我要學風水

我要學風水，
我要風生水起，
因為有三大原因．

1) 風水絶對是一門有科學根據的知識:
你睇吓香港應用科學院都揾人睇風水啦,
重一睇就睇咗三次呀,
前前後後用咗十八萬呀,
連搞高科技嘅學者專家都睇喎,
你話風水點會唔科學吖?
我諗只要我肯努力,
將來一定可以攞個諾貝爾【風水奬】架!

2) 風水未必要求實際效益的:
俗言都有話啦:"風水佬呃你十年八年",
就算我學藝不精,學到半桶水都無有怕,
還便科學院入便班學者都係咁啦,
政府每年撥款一億二千萬,
咁多年來佢地啲所謂完成行目嘅回報率最高都係得54%,
大部份都係介乎10%樓下,
有啲重係零效益添,
旣然科院啲專家都係咁,
我諗就算我睇唔準啲風水都無事啦,
還便佢地都唔睇成果嘅,係未?

3) 做埋班學者嘅私人生意:
你咪以為班學者無錢呀,
科院每年有四成幾費用都係俾佢哋啲人工,行政架,
有啲人工重可以高過指定嘅薪金指標二倍幾添,
佢哋咁有米,如果間唔中可以做返一兩單私幫都發啦,
而且佢哋啲花紅奬金都係『暗標』嘅,
積係連政府都唔知架,
你話我學咗風水入到去揾食係未會風生水起呢?
發逹囉~~~~

PS:唔知大家啱啱年頭交啲稅有幾多成去咗哩班學者袋入便呢？

無手尾自私鬼！

本來只是小事一宗，
但是實在見到太多太多次了，
你唔要咪放返入原位囉，
為什麼要隨便亂放放呢？
這些是冰鮮食物來的，
隨便亂放一兩小時好易會變壞的，
唔好以為吓吓有人會立刻執你手尾，
做人要有公德心先得架，
你知唔知物嘢叫『自重』呀？

你信唔信吖？？？

我對那些所謂問劵調查產生了很大的疑問！

難道我們對這間大企業真的誤解了？

難道內裏工作的員工真的覺得十幾元一個鐘的工資己經十分合理？

不知有没有人看了這個廣告有興趣加入麥記這個大家庭呢？

狂風暴雨後感

昨晚那一場狂風暴雨真是敎人心胆俱裂,
只不過是數分鐘的時間就弄到天昏地音,
樹木東歪西倒,修路鐵馬翻倒,垃圾桶吹翻,
在家裏看出去尤如十號風球一樣的厲害,
那刻真有點怕天會塌下來,
天有不測之風雲,
所言不差!

金像奬後感

九流就是九流,
明明係舢舨點可以充炮艇,
金像奬那三個主持嘅表現實在使我慘不忍睹!
互相欠缺默契,
講嘢詞不逹意,
笑話枯燥無味,
氣氛節奏免奉，
表現難登大雅之堂，
香港演藝工業真是那麼人材凋零嗎？

頒獎典禮本來己經無甚看頭，
除了霍元甲外，
差不多所有戲都没有看過，
不是不想支持本地創作，
但那些片種實在無法引起我入場的意欲，
不是黑社會就是那些屎尿屁白痴笑片，
對本地創作己經意興闌珊了，
再加上表現強差人意嘅主持，
無怪不少人對本地創作投下不信任的一票，
懇請本地的老闆和創作人，
多點發掘一些有趣有意義的題材，
再加點誠意和創作力，
不要再獨沽一味千篇一律了！
今日嘅景況除了是翻版問題外，
空洞無物的作品都要負上一半的責任！

老媽語錄:坐車仔

新鮮媽:『呃錢架!』
新鮮人:『物嘢呃錢?』
新鮮媽:『你睇吓,突登整個公仔阻住哂,五蚊得一個細路有得玩喳!』
新鮮人:『係十蚊一次呀!』
新鮮媽:『咁仲衰,呃雙倍添!』
新鮮人:『啲細路鐘意有公仔陪住坐嘛!』
新鮮媽:『咁不如我陪佢地坐,每人俾返五蚊我好過啦!』
新鮮人: -___-!!!

光棍佬敎仔呀！

其實兩鐵合併與否我真是没有什麼所謂,
現在支持合併的人大多數都是希望合併後可以減價,
但哩個世界邊度有咁大隻蛤蚧隨街跳吖,
地鐵主錢果豐話如果明年四月立法會未能通過合併草案,
地鐵就會有加價壓力喎,
咁樣擺明係出口術啦,
電視上又係咁賣廣告,
什麼雙併唔加價喎,
想出埋群眾壓力逼立法會盡快通過草案啦!
地鐵哩招果然厲害,
如果我哋盲踪踪就話合併就實死無疑!

哩單簡直係領滙嘅翻版呀,
地鐵係上市公司哩架,
最終嘅目的係賺錢,
重係愈多愈好添,
話就話合併後就會減價，
減幾多先？點減先？
減少少後會唔會加返多多先？
合併草案建議票價根據物價及工資數據計算,
而且又毋須諮詢立法會,
到時年年通漲咪要年年加價?
地鐵係香港人嘅生活必需品,
如果無王管你話大唔大劑吖?

你哋記唔記得東隧單嘢呀?
由於政府無權監管隧道收費,
結果咪任佢加幾多就幾多囉,
東隧老闆榮智健重吋到話想收購埋你條紅隧添呀!
所以係一些對民生有重要影響嘅課題,
我哋真係要小心行事,
千奇唔好俾眼前小利蒙蔽,
否則禍害無窮呀！
你唔搭地鐵東鐵可以搭物吖？
唔通搭巴士轉九次車咩？

老媽語錄：清明節

新鮮人：『哩幾個星期好多人拜山喎！』
新鮮媽：『清明嘛！』
新鮮人：『嘩～～啲人又雞又燒豬好有孝心喎！』
新鮮媽：『生時唔做，死咗先至做，攪咁多嘢把鬼！』
新鮮人：『同你飲茶算唔算做咗嘢呀？』
新鮮媽：『緊緊算啦，做多啲重好！』

新鮮人：『噢～～啲人攞住大包細包啲係物嘢黎架？』
新鮮媽：『紙元寶嘛！』
新鮮人：『咁多包咪有排摺囉？』
新鮮媽：『有得買架！』
新鮮人：『咁咪又要俾錢人賺囉！』
新鮮媽：『哩啲咪名副其實嘅燒銀紙囉，哂氣！』
新鮮人：『係啦，一啲都唔環保！』
新鮮媽：『我地下個禮拜買盒燒肉就算，拜完自己食埋佢！』
新鮮人：『你都幾實際喎！』
新鮮媽：『梗係啦，唔係點養大你哋班嘢呀！』
新鮮人：『係嘅！係嘅！』

大力水手

噚日經過"邦先尼"忽然眼前一亮,
見到個舊朋友,
嘩~係大力水手呀,
好耐無見喇,
咁耐去咗邊樹呀?

我退休啦,都好耐無出黎同啲後生仔爭飯碗囉!
我細個好喜歡睇你套卡通片架,係你粉絲黎喎!
而家邊有細路識我架,個個都係"騎勞勞"嘅擁躉了.
布魯圖點呀?重有無搞東搞西捉走你條女愛麗斯呀?
佢而家收心養性囉,無搞事喇,同我都唔知幾fd呀!
咁就好啦,做返fd咪好囉!

呀~~~點解今次又無端端走返出黎做時裝代言人嘅?
而家興懷舊嘛,好多老嘢都出返黎玩吓啦,好似靚女betty,hello貓貓咁囉!
見到你真係好開心呀,等我都買返件著吓先.
唔好掛,你唔怕啲十幾歲0靚仔笑你咩?
少少啦,其實我喜歡裝衫有你嘜頭嗰個鐵桶多啲,唔知有無得買呢?
等我幫你問吓啦.
唔該哂呀,記得幫我係桶上面簽個名喎.
無問題, Popeye~~~~the 死啦man~~bobo!

群蚊亂舞!

今晚啲蚊真係又餓又惡,
己經噴咗蚊怕水了,
但還是係我腳邊氹氹轉,
後來係房開咗驅蚊器,
但還是有少量係度飛來飛去,
再係廳度點埋蚊香先至可以鎮住它們,
現在那是有不少餓蚊係我四週迴旋,
我諗佢哋一定係好肚餓,
所以先至會不斷『冒死作戰』,
救命呀~~~
求吓你哋放過我啦,
我好眼訓呀!

靜吓啦！

今晚七點幾返到屋企，
諗住休息吓，
點知樓下開居民大會鬧交，
另外斜對面對衰貓又打交，
再另一邊又有對姊妹爭吵，
斷斷續續噪咗成兩個鐘，
搞到我想靜吓都唔得，
係嗰刻真係好想請哂佢哋食嘢，
食物嘢？

食老鼠藥囉！

茶水房記趣

公司茶水房係吹水嘅地方,
亦是員工『高茶』的地點,
除咗一般嘅奶茶咖啡阿華田外,
究竟你公司茶水房有什麼嘢食呢?

以前做過某間公司係茶水房會有免費汽水同涼果,
又試過有另一間公司有杯麵同餅乾,
因為老闆想我哋OT都有嘢食嘛,
你話佢係唔係『好好心』呢?

記得曾經做過一間公司嘅茶水房是空空如也的,
除咗可以冲吓嘢飲外就什麼都没有,
那時有個好喜歡食零食嘅妹妹同事,
成日都買埋買埋好多零食係佢櫃桶,
餅乾,蛋糕,糖果,朱古力,杯麵等等,
就連雪條,雪糕都放咗五六杯係雪櫃，
佢見我哋OT無嘢食就好心俾啲餅乾蛋糕我哋,
但係所謂『長貧難顧』,
我哋又唔想成日都白食佢,
於是就次次都要佢收返錢,
久而久之佢直情係公司開起『士多』來,
不單只自己部門的人會幫襯,
就連其它部門的同事都會來入貨,
最高峰時期一日有幾百蚊生意架,
而家諗返都覺得幾有趣！

叫雞都要優質服務!

【蘋果日報】四月十五日訊
雙程漢尋歡嫌貴爭執後捱斬

一名雙程證「豪客」昨到夜總會買鐘與兩名女公關外出，他結賬時嫌收費貴與職員發生口角，其後他與兩女公關乘的士到九龍城繼續消遣，其間一名女公關曾在車內打手提電話。三人落車時事主即遭三至四名持刀大漢斬傷 。

不知這單新聞會不會成為另一宗投訴香港未能提供優質服務的新聞呢?
以前就是港人北上尋歡作樂居多，
現在國內有錢人多的是，
古語就話飽暖知榮辱，
現在則是飽暖思淫慾，
所以他們都想下來嘗嘗香港式的温柔，
但唔知他們知不知現在香港好多小姐都是來自我國北方呢？
如果真的讓他們知道就實會去中聯辨投訢了，
因為同樣『貨色』在深圳百多元人仔就有交易，
但在香港就可能要成千蚊，加埋啲酒水錢等等，
你話唔投訴就有鬼囉！

醜陋的中國人

今早看到一宗使我極之心寒的副刋散文.
廣州白雲區一名司機誤傷一位三歲女孩,
他第一個反應不是下車救人,
也不是開車不顧而去,
而是入後波回輾女孩,
誓要把她輾斃為止,
目的十分簡單但極度冷血,
車傷人賠償會好長手尾，
車死人未必有人知，
就算有人知都只是一筆過而已，
在內地人命真的如此下賤？
後來那個司機當然被市民所擒，
拿去嚴懲，還駡他豬狗不如！

相信這類新聞不是個別事件，
我真的不知道何時，何解我們中國人會變得這樣？？
自己都略讀中國歷史文化，
以前的中國人不會是這樣的，
所謂仁，義，禮，信全都漸漸消失於中國人身上，
是不是五六十年代的大躍進把中國人的美德全數『躍』去了？
定還是給我們的紅太陽改革得消磨殆盡？
又或者是黑貓白貓捉到老鼠就是好貓的原固，
不理人性只要利益的思想薰陶得當今的中國人如斯冷血？

我感到十分悲哀和沮喪，
心裏想着柏楊的【醜陋的中國人】！

小笨狗

你做物苦口苦面呀?
係唔係你主人唔理你呀?
定係佢唔俾你出去玩呢?
笑返吓喇,
唔好黑口黑面咁樣啦,
最多我陪你玩吓啦,
好唔好呀?

要自我宣傳

『有麝自然香』?
我從來都不相信的,
現今社會通訊發逹,
人人都搞吓宣傳,
有好嘢你唔講吓,
人地都唔會知啦!
賣東西是這樣,
打工亦都是這樣!

朋友工作表現不俗,
但得不到上司欣賞,
個人認為可能係『宣傳不足』,
人家看不到的話,
就算你再勤力都無用,
成果只會給那些擦鞋仔取走,
所以係適當的時候,
要係自己老闆面前表現吓,
咁樣先至會做到事半功倍!

自我宣傳有好多種方法,
最差就是『賣花讚花香』,
你會不會相信『誠實地產』是最誠實吖?
你又會不會相信『好味胶子』係最好味架?
你愈是這樣說我愈覺得你心中有鬼喎,
好似早前某女歌星係頒獎典禮大大聲話:『我都唱咗十年喇』,
你不是初出道係人都知喇,
講得咁露骨不但收不到預期的效果,
反而會令人有討厭的感覺,
所以此為下下之策!

反而在不自不覺中,
讓人家看見你的功力,
又或者借人家的嘴巴傳到老闆耳中,
這方為上上之策,
這是一種潛而默化的技倆,
雖然不是萬試萬靈,
但總好過直接自吹自擂嘛!

ps:其實寫blog都可以咁喎! 嘻嘻~~~

扑了一年(二)

扑了一年,
除了練習了打倉頡外,
另一個值得注意的就是關於語言用字問題,
主要是究竟要用正統的語體文還是廣東口語呢?

自己曾經在這個問題上掙扎了一段時間,
初初覺得應該要寫語體文較好,
因為這樣比較正統和有規則,
但後來發覺用語體文並不能充分表逹自己的意思,
所以後來就多用了廣東口語,
除非是一些異常正經的文章,
又或是一些所謂懶有詩意的東東,
我才會用語體文書寫,
但是我這個blog多是一些語無倫次的東西,
所以你會好少見到我寫語體文了!

胡思亂想!

圖片:【蘋果日報】

「日本是獨立的國家，非附屬於共產中國」

你們實在想得太多了,
我國從來都没有想過日本是我們的附庸,
只是你們曾經想吞併我們的國土,
請不要把自己的思想加諸予別人身上!

我的中國心

港台《議事論事》調查結果（部份）

1.如果可以選擇，你會做甚麼人？
九七後的特區人：41.1%
九七前的殖民地人：31.0%
兩樣都沒有所謂：21.8%

2.你是甚麼人？
香港人：61.8%
中國人：36.4%

我的答案係:
1. 97後的特區人
2. 中國香港人

不覺得現在特區政府做得好好,
只是無理由由英國人統治我們,
覺得97前好多是因為經濟問題,
自由度就從來没有很大的改變,
殖民主義是無包涵民主的字眼,
相反北京亦不大提倡民主精神,
由於我是黃皮膚黑頭髮的關係,
所以我較支持中國人管中國人.

我是炎黃子孫是無可否認的,
我亦以此為傲,
從來都不覺得做中國人不好,
但那種歸屬感只限於源遠流長的古代中國文化,
對於當今的中國環境還是覺得格格不入,
國內做事的方法,法理思想,文化興趣等都與我有很大的分野,
所以我會說自己是中國香港人!

扑了一年(一)

原來昨天是我寫blog的一週年,
本來上星期已經想好要寫什麼,
但到了昨日又好像没有了那種衝勁,
而且連一週年也忘記了!

當初開始只是因為朋友介紹,
覺得有趣便開始寫了,
其實没有什麼目的的,
我想寫了一年最直接的收獲是學曉了打倉頡,
以前會覺得學打中文字無用,
工作上絶少用到中文,
所有文件都是英文為主,
但漸漸發覺時移世易,
唔學會同世界脫節,
初初都係逐個碼咁打,
真係慢到飛起,
如果要打一篇百多字的文章,
隨時要花上半小時以上的時間,
記得有幾次千辛萬苦打了一篇幾百字的文章,
正在posting的時候,
發覺網絡出現問題,
整篇文章就咁『消失』於網絡中,
那刻的感受就是想死,
更無精力由頭再打一篇,
結果就放棄了那次的post了,
現在就好多了,
雖然還不算是快,
但打幾百字的短文己經絶不是問題了,
如今打得中文的速度比打英文還要快啊!

拼圖遊戲

在Eyer那裏見到這個自劃拼圖遊戲，
十分有趣過癮兼抵死，
有興趣你都玩吓！
唔知用黎做blog相好唔好呢?

九流小說：命懸一線

一個手抱三四歲小孩的母親悲哀求着：『求吓你,俾個籌我啦，我個仔發緊高燒呀！』
一個穿着唐裝衫褲的醫院工作人員語帶不肖：『你攞個複診咭黎先啦！』
『我都未黎過，物嘢複診咭呀？』
『你重呃我，我認得你架，重話無黎過！』
『我真係無黎過呀，而家半晚三更你叫我係邊度變個複診咭黎呀，求吓你啦！』
『你唔洗求我，總之無複診就無籌攞，無醫生睇！』
『我無呃你架，你睇吓我個仔燒到成個身都紅哂喇，佢就黎死啦，做吓好心，俾我睇咗醫生先啦！』
『走，走，走，無得睇，無咭無得睇！』
『你個ｘ街，如果我個仔有物事，我實唔會放過你！』

那個婦人頭也不回就衝出了廣華醫院，
婦人好像瘋狂了一樣左右四處尋找的士，
但半夜三更街上着實難找一部車．
『救命呀～～我個仔就黎死喇，有無人呀～～』
就在這時終於有一部的士經過，
婦人不顧一切的衝出馬路中心把車截停，
『伊利沙伯，快，快，快，我個仔就黎死喇～～』
那個的士司機被這突然其來的行動嚇了一跳，
但見那個小孩已經快腌腌一息了，
他也不管一切踏盡油門駛去．

的士司機見燈過燈救人要緊，
剛到門口婦人已如箭一般奪門衝入醫院，
『救命呀～～救命呀，快啲黎救我個仔呀～～』
醫生急忙走上來，
見那個孩子面色己經發灰，
知道情況緊急便一手接過送去急症室了，
那個婦人本欲一併追入，
但給醫生阻止『你入去只會阻礙我們工作，你係外面等等！』
心急如焚的婦人尤如鑊上螞蟻在門口走來走去，
時間就好像完全停止了一樣，
『點解咁耐呀？你千奇唔好有事呀，救苦救難觀世音菩薩～～』
急症室門終於打開了，
『點呀？點呀？無事嗎？無事嗎？阿仔～～～』
『太太，你放心，你個仔無事喇，好彩你黎早幾分鐘，唔係就無得救喇！』
婦人即時跪在地上『嗚～～多謝你多謝你～～你救返我個仔～～多謝你～～』
『唔好咁，你起身先啦，快啲入去睇吓個仔啦！』
『多謝你，多謝你～～』
婦人立刻衝入急症痓，
見到自己的兒子安靜的躺在床上，
那時才放下心頭大石，
而整個身軀就好像虛脫了一樣軟了下來，
她緩緩摸着孩子的頭，
雙眼的淚水不斷流下，
嘴角慢慢重現一絲笑容！

自戀狂

有無見過啲自以為好靚嘅人?
我噚日就唔好彩俾我撞到個,
佢以為自己係人間仙子,
個個都要為佢嘅風姿傾倒,
每刻都顧影自憐,
諗起都想反胃!

行人電梯向上,
隔離向下的有一個穿著普通,
姿色一般的女子從上而下,
她不斷向傍邊的玻璃墻照着,
我只是剛巧向上飄到她一眼而己,
她就特意搔首弄姿嘴角暗笑,
而且眼角以不肖的神情回飄我一眼,
那刻真是給她的反應嚇了一跳,
我又不是刻意睇佢,
來回只不過是一秒鐘的時間,
她就以為我被她的『天香國色』迷住,
真係救命呀~~~~
做人貴自知,
就算你有傾國傾城的美貎,
人家都未必一定會被你所迷,
何況你只是普通到唔普通嘅庸姿俗粉,
請你節省一點吧!
嘔~~~~~
嘔完再嘔~~~~

愈黎愈離舖!

【蘋果日報】四月十一日訊
香燭烙舌 強迫自慰 膠水封嘴 鑊鏟打腳板 兩漢12招淫辱16歲少女

天水圍天慈邨發生少女遭欺凌虐打事件，兩名無業男子涉嫌禁錮16歲相識少女，不僅施以拳打腳踢，更以12種不同招式凌辱她，包括以香燭烙舌頭，超能膠封口，迫她用鼻吸索洗衣粉，又威嚇要她用花灑自慰，最後因目睹經過的友人獲准離開才報警.

哩個係物嘢世界呀？
以前啲人衰極壞極都係『打你鑊金』啫，
點解而家啲人咁有『創意』架，
咁衰格嘅嘢都做得出，
又唔係十寃九仇，
唔洗用啲咁變態嘅招數呀？

嗰兩條友都唔細啦，
一個35,另一個都24歲啦,
都唔知係唔係睇得多啲『黑社會』片多,
學埋學埋攞返出黎用,
你估係黑社會行家法呀,
就算有物唔妥都唔洗咁吖?
細路女黎喳,
哩啲人咁大個敎都敎唔掂架啦,
不如全部攞哂去垃圾堆填區算吧啦!
真係唔死都無用!

賣假嘢?你死梗喇!

內地販賣的USB STICK

如無記錯，此相片是出自嬲記那裏的．

要嚴打,要高調嚴打,
連中聯辨副主任都出黎講兩句就啱啦,
賣假嘢,賣假鑽石手錶咁大件事喎,
梗係要高調處理啦,
成幾萬蚊隻錶都有假,
咁樣破壞香港優質購物嘅美譽,
點可以唔以超高調打擊呀?
香港啲什麼旅發局官員梗係要上京了解道歉啦,
唔係第時無內地人黎香港買嘢就大件事囉!

人地吓吓買嘅都係金銀珠寶黎架,
梗係要高調重視啦,
我地啲香港人上去,
買來買去都係啲CHEAP嘢之嘛,
什麼血棉被,血公仔,孔雀鍚緑,蘇丹紅,甲醇酒,污糟鴨,發莓生果,洗衣粉油條,PAAG.....(下删一萬字）都係唔值錢嘅，
梗係無需要咁重視啦，
不過話時話，
如果要投訴，
唔知中聯辦會唔會高調回應呢??

致:爭產案神秘人

係你嘅就係你嘅,
你唔洗咁心急黎澄清吖?
宣讀遺囑那天不是什麼都清楚嗎?

本來是一件美事,
救助窮苦百姓,
無奈有人見錢開眼,
急於撲出認領,
如果你是「唯一受益人」,
請問你有否協助辦理人家的身後事?

雄黃酒與解酒湯

"因為寂寞,不免諸多回憶."

李碧華【青蛇】


沾上情的人就如飲了雄黃酒的蛇妖,
裏外都不是人,
因為理智漸失,
渾身原形畢露,
任你平時多麼道行高深,
那時你都變得天真幼稚,
緃然此情不再,
人總沈醉其中,
也許時間才是最好的靈藥,
但不知要過多久才會酒醒!

老媽語錄：執米！

新鮮人：『嘩～～幾多米執，如果打仗時咁執就唔洗捱餓囉！』
新鮮媽：『打仗時邊度有米你執呀？』

其實只是輕輕一句就看出你有無經歷過，
有些東西是要親自面對過才會知道實際的感受！

老媽語錄:攞奬杯!

新鮮媽:『你係度做物嘢?』
新鮮人:『賽車囉！』
新鮮媽:『賽黎做物嘢?』
新鮮人:『賽贏有奬杯攞!』
新鮮媽:『去邊度攞個奬杯呀?』
新鮮人 -_-!!!

真真正正放假

香港人是一個奇怪的族群，
平時生活節奏緊迫，
每天都會工作八小時以上，
本來應該是好疲倦的，
但是如果有長假期，
他們就會把玩耍的節目排得密密麻麻，
好像想把每一分每一秒都填滿似的，
通常長假期的前段就是瘋狂的玩樂，
最好就是通宵逹旦不醉無歸，
但到假期最後一天就會處於半休刻狀態，
一般都會睡到中午以至下午四五點才起床，
其實這樣三日當四日用真係好辛苦，
通常放完假比放假前更加疲勞，
咁樣『利用時間』又何苦呢？

有時放假"hea"吓,
在家輕輕鬆鬆什麼都不做,
又或者隨便看看書,
有時間去看一套戲,
不要把節目排得密不透風,
讓身心得以全面休息,
這樣不是更加好嗎?
至少第日返工唔洗做熊貓圓圓吖!

魔疫(The Reaping)

魔疫(The Reaping)是一套不錯的電影,
以懸疑驚懼而言它是不俗的,
無論在特技橋段節奏都是合格之選,
而且再以聖經十大災難為賣點,
本應該是非常有吸引力的,
無奈戲尾以宗敎解答一切問題就使人有點洩氣，
我不是想討論宗敎觀點，
那是没完没了的爭論，
但以戲論戲而言，
女主角是一個曾經相信主的人，
但後來家人遇害後則對宗敎產生懷疑，
而且四處以科學觀點來解釋一些所謂神蹟，
內容本是十分引人入勝的，
可惜戲未段就一切原因納入宗敎正軌，
所有奇異災害都是源自宗敎問題，
不是所有入戲院的都會是敎徒，
如果以宗敎立場作結實難使人看得盡興！

太陽倒數

如果你是一個極度理智同講劇情合理性的人,
請你不要浪費金錢看這套戲,
因為你會發覺好多不合理和不合劇情發展的地方,
但如果你是一個感情浪漫和喜歡看美麗太陽火熖的人,
你可以入戲院一看『大陽倒數』!

我本來是一路看一路不滿劇情發展不合邏輯的人,
當看到中後段後都覺得無所謂了,
就當是一次浪漫嘅科學幻想吧,
反正如果當太陽都幻滅時,
一切生命都會化作塵土,
什麼邏輯都不必爭辯了!

滿清十大酷刑~石春路

今朝一早去做運動，
見到條石春路就身痕走去試下，
嘩～～～～佢阿ｘ吖，
行左一分鐘左右喳，
痛到我眼水都標埋，
唔好話我五臟六腑都有事呀，
啲石春又尖又硬，
係上面行唔痛至奇呀，
我懷疑發明石春路條友係有被虐狂嘅，
根本就係滿清十大酷刑嘅變奏版，
下次我點都唔會試架喇！

ps:有醫師話每個人的身體機能不同,腳底穴道可受力度亦不同,所以佢地都唔提意市民胡亂行石春路!

儍瓜問題～廣東諺語

好耐無同大家見面嘅儍瓜問題又出現喇！
今次要問嘅係廣東諺語．

1) 點解係駡人『痴孖根』,而唔係『痴三/四/五...根』呢?
究竟係邊兩條根痴埋一齊呢?
以下是我可以找到的答案:
『痴孖根』又名『黐孖筋』,,黐孖筋源自黐筋，因 "筋"可指腦筋或神經線,"痴孖筋"意指其神經紊亂，腦筋打結。既然是腦筋打結，一條又點打結呢，所以有人稱之為黐孖筋，亦可表示這人比黐筋，更嚴重。

2) 點解話人呃你叫『你呃我膝頭哥唔食辣椒醬』呀?
你全身除左個口都唔會食嘢架啦?物膝頭哥會食其它嘢咩?
劉天賜話:
膝頭哥不是人，不是阿哥，不會食辣椒醬的，這簡單明顯的道理或事情還拿來欺騙？呃我膝頭哥唔食辣椒醬咩！

3) 點解係『黃皮樹了哥唔熟唔食』呢?
物了哥會食唔熟嘅生果咩?定亦或了哥淨係食黃皮呢?
這題不用解了,因為大雄己引述了,詳情可以看他的comment!

4) 點解『新屎坑會香三日』?
可唔可以香四日五日架?以前啲人唔洗屎坑嘅咩?
可能以前的屎坑唔係用冲水馬桶，只是係地下掘個大坑，然後上面放幾塊木板圍幾塊木墻就係廁所了，跟住就人人係痾，都唔會去清理，你話臭唔臭吖！至於點解係三日，應該是中國用語習慣，我們有所謂三朝回門，意就是新了過後嘛！（這個純屬個人推測，得啖笑而已！）

以上啲問題好似好無聊,但係你有無諗過點解吖?
我成日都會諗埋哩啲儍瓜嘅嘢！

少女尋春

招男友:
要靚仔.
12-14歲,身高1米5或6米,身材一般,
有意者請明天至365,揾穿校服,
正在看地獄少女和玩勁舞,叫155嘅人士,
快啲泥啦,我地等你.
記住要嘴我一淡^v^
kiss kiss

如果你得12-3歲個女係公園寫啲咁嘅嘢,
問你驚唔驚?
但係你睇埋班仔寫係下面嘅答覆重驚呀!!

雲南遊記

今日有朋友跟護苗基金去雲南做探訪,
主要係去了解山區啲貧窮小孩嘅生活問題.

記得好多年前自己都曾經去過雲南大理,
點蒼山腳下,洱海傍就是有千多年歷史嘅大理古城,
那裏仍然留着千多年前的建築群和古城牆,
而且大部份都是小數民族居住,
走在城中就好似活在古代的大理皇朝一樣,
由於城鎮太舊日久失修,
大街兩傍的房屋全都是向一邊傾斜,
再加上所以店舖都掛着大大小小的民族手工藝品,
好似銀器,頭飾,手鐲,以至小數民族服飾等等,
走着走着就會不知不覺買了很多很多,
現在我還有少量放在新鮮媽家裏!

可惜大理是一個極早開發的旅遊區,
每年大量中外遊客到訪,
當地人為了迎合外國人的口味,
開設了不少露天薄餅店同咖啡室，
瞬眼看到，還以為自己身在利大意，
傳聞那裏的薄餅同咖啡是加左少量罌粟，
所以客人食過以後都會禁不住要再幫襯，
是真是假我就不知了，
因為那裏的小數民族菜式更加吸引我，
無理由去雲南食薄餅飲咖啡而不吃當地嘅特式小菜嘛？
如果你們有機會去就幫手証實一下吧！

ps:由於當年懶型,所有相片都是以幻燈片拍攝,故不能把雲南大理美麗的風景一一展現大家眼前,請見諒!

奴性與盲目!

因為一單"黑道持槍恐嚇片"使到台灣TVBS受盡指責，
錯就要認，本來無可厚非，
人家的總經理已辭退了,錢又罰了,
但那班"農民"硬要人家關門就有點過火了,
最奇怪的那班"農民"都是打着民進黨的旗號,
為什麼要把事情搞得政治化呢?

那班農民指責台灣TVBS早前失實報道以瀝青來清理鴨毛,
本來只是雞毛蒜皮小事,
但這次有那樣激烈的行動,
好明顯是有人在背後搞小動作,
而那群有頭無腦的人就成為家打擊異己的工具了.
台灣TVBS一向給人一種偏向某政黨的感覺,
估計今次有人可能會剩機剷除敵對傳媒,
來一個一石二鳥！

不是每個人都有政治智慧，
有些人是不會理會黨做過什麼，
不會理當政者有没有做錯事，
他們只會盲目支持，
連叫他們去死也會願意,
就如以前盲目順從帝皇一樣，
或者民主精神在華人心裏是種不下根，
那種盲目跟隨的"奴性"是永遠改不掉的！

再見小甜甜!

贏了,一切還是帶不走;
輸了,只乘下孤獨一人,
相爭八年,何必呢?
就讓一切隨風吧!

靜下來！

每次聽到這首《願》都會有一種神傷的感慨,
九四年的《晚九朝五》裏有陳小春,陳豪,張睿玲,周嘉玲....
他們係戲裏過着靡爛的夜生活,
晚上九點至早上五點才是他們最精彩的時候,
溜漣酒吧夜店隨便找個合眼緣的人上床,
早上起來又如行屍走肉的上班,
雖然是十多年前嘅電影,
但回看今天,
不少年青人還是過着差不多的生活!

或許每個人都曽經經過茫然無目標嘅階段,
曾幾何時我都有類似嘅生活,
雖然没有電影裏咁誇張,
但蒲夜店酒吧日夜顛倒，
搞到日間工作魂遊四海，
這樣的生活只會愈過愈空虛，
漫無目的只曉得夜夜笙歌咁，
真係毫無意思，非常厭倦，
人愈大就愈唔想蒲，
只想有一個家，
回家可以有一個人一齊看電視，
一齊食餐家常便飯就心滿意足了！
蒲，真係唔再適合我！

老媽語錄：我至憎我阿嫲

你們對自己上一代了解有幾多?
知不知道他們小時候的生活如何?
知不知他們的志願是什麼?
知不知他們小時一些鎖事?
以下是新鮮媽的自白:

『我最憎我阿嫲,佢唔俾我讀書!』
『佢話女仔唔洗讀咁多書,無用又浪費金錢!』
『後尾我靜靜雞係屋企穀倉逐少逐少咁攞啲縠去交學費喳.』
『連讀書張枱椅都係自己抬舊屋啲爛枱用架！』
『我書法唔錯架，老師都讚過我，重攞過比賽冠軍添！』

『我憎到我阿嫲死！』
『有一次佢揾滾水淋我隻手！』
『成塊肉爛哂又含濃，痛左我幾個月！』
『我阿媽又怕事，唯有靜靜咁幫我搽藥膏，我老豆一句聲都無出！』
『我老豆老母都係重男輕女，淨係識叫我寄錢返去俾我阿哥搞生意！』
『我好憎我阿嫲，佢死左咁多年我都無拜過佢！』

『我好想做護士，鄉下隔離屋個女仔走左去廣州讀！』
『落到黎香港我想去做導遊，走左去讀英文！可惜無人介紹入唔到行！』
『三婆介紹我打工，包食宿，但三年來佢攞哂啲人工，我一毫都無！』
『老豆老母問我攞錢，我話無，佢地唔信，話我自己洗哂，我真係蠢！』

『我喜歡去邊就去邊，食什麼就食什麼．』
『自己錢自己洗，唔洗再寄錢返去俾我個衰大佬！』
『我而家最開心，因為無人可以管我！』

ps:我覺得新鮮媽係一個幾堅強嘅女性,十四五歲自己一個人落到黎捱世界!

正垃圾！

朝朝早經過月華街公園，
都會係同一個位置見到一堆垃圾,（今朝己經係最少了）
我估計係啲死靚仔夜晚係度吹水留低嘅，
因為有時夜晚經都見好多靚仔係度溜漣,
差不日日都係咁，
行過兩步就有垃圾筒啦，
佢地學校家長無敎嘅咩，
成班正垃圾無家敎，
行多兩步掉會死咩？

哩啲咁嘅垃圾少年我都見唔少，
見過成班係廣場樓梯食外賣Ｍ記，
成五六個人食完就咁掉哂啲紙袋係樓梯，
臨走重要踏兩腳，搞到一地都係汽水，
正人渣無敎養抵佢地將來做垃圾佬受返哩啲嘢！

早幾個星期又見過幾個飛女學生妹係公園食煙，
食完手指一彈就咁將枝未息嘅煙仔彈落地，
有無搞ｘ錯呀，
女仔之家著住校服係公園食煙己經衰格到無人有架啦，
重要咁樣掉煙蒂，
好易會火燭架，
如果唔係佢地走得快，
我實會走埋去問候佢地全家，
重要佢地執返枝煙仔，
哩啲咁嘅『社會楝樑』正廢物，
連咁基本嘅社會責任都唔識，
真係唔死都無用呀，
正垃圾！！

有無諗過寫咸濕小說呀?

這幾天同大雄討論係blog寫咸濕小說接龍嘅可能性,
其實如其話係討論,
不如話係我想著可否開始吧,
我想大雄都是說說笑而已!

有專家指出,
男性每五分鐘腦海就會閃過一些與性有關的東西,
可能係一些穿著性感嘅靚女啦,
又可能只係以前一些温馨嘅片斷，
但又不一定是那些色慾橫流的東西，
我當然没有深究過,
但又好似真係男人會比女人易想起這些喎!

說返轉頭，
究竟係blog度有無可能做到咸濕小說接龍呢?
有無人會有興趣參加呢?
我講嘅所謂咸濕小說並不是指那些純充滿色慾字句的淫蕩文章，
而只是一些反映大都市中不同身份不同年紀的兩性複雜關係，
其實不如叫佢做艷情小說好聽啲喎,
唏～～～講咁多做物，咸濕就係咸濕啦，
又唔係咸濕唔可以寫文章嘅，
咸濕都可以有好文章架，
你睇金瓶梅咪幾多人睇，
有時間我都要睇下先得，
學吓嘢嘛！

我諗這個構思是踩綱線的，
一來可能無人會參加，
二來黎開啲blog友可能唔會再黎,
三來又可能會有人舉報你,
你知啦,有啲人好保守架,
就算我所謂嘅咸濕小說只是點到即止,
但都可能會有人投訢架,
你都見連『秋天的童話』嗰幾句粗口都有投訢啦,
一陣又可能話啲小說有些微情慾橋段會敎壞人,
而家啲人好『保護』啲細路架,
最好有個防菌大膠囊罩住佢地,
咁樣就可以百毒不侵啦,
好喇,講咁耐,
大家對於我哩個提意有物意見呀?

聰明豆

Smarties, Smarties......
又香又甜又好味，
大家都食聰明豆......

以前好喜歡食這個聰明豆架,
一來一筒有成廿幾粒,
二來價錢又平宜,
雖然我地唔會蠢到以為食左會聰明啲，
但係人人都食你唔食咪好瘀，
如果真係食左會聰明啲你唔食就死火啦，
所以個個細路都會揸住一筒係手架，
有時重可以用來扮玩番攤添，嘻嘻～～～

以前筒朱古力豆係圓筒形架，
唔知幾時變左做六角形呢？
物咁樣好揸手啲咩？？

金寶湯

原來金寶而家出左咁多歀式喎，
以前淨係有雜菜,牛尾和忌廉雞湯三款，
現在歀式多到數都數唔哂，
包裝又古零精怪花哩花碌，
啱哂啲細路哥，
但係我就麻麻地,
諗起啲忌廉就唔啱口味,
好似好滯咁呀,
以前我飲兩啖就會停口了,
不過睇吓個包裝懷念下都好!